الكفالة في الإسلام: النسب والميراث وفضل كفالة اليتيم.
دار الإفتاء تؤكد جواز توجيه الزكاة إلى يلا كفالة.
أدلة وتقارير ووثائق للتحميل.
يحتاج كل طفل إلى منزل حبيب. تلعب هذه المدونات دورًا محوريًا في تعريف الكفالة، تحويل حياة الأطفال وإنشاء أسر للأبد.
بنبدأ خطوة جديدة ومهمة لتوسيع نطاق عمل مؤسسة "يلا كفالة" في صعيد مصر، من خلال شراكة استراتيجية بنظام التعاون العيني مع مؤسسة "هي" للتنمية وتطوير الأسرة . تم توقيع الشراكة يوم 29 سبتمبر 2026، والشراكة دي بتجمع بين خبرة مؤسسة "يلا كفالة" المتخصصة في التوعية والتدريب والاستشارات في مجال الكفالة، وبين الحضور الميداني القوي لمؤسسة "هي" وقدرتها على الوصول للمجتمعات المحلية في مختلف المحافظات. من خلال الشراكة، بنهدف للوصول لأسر ومجتمعات غالبًا ما بتكون بعيدة عن فرص التوعية والوصول للخدمات المتاحة، وخلق فرص أكبر لفهم الكفالة، والوصول للدعم والمشاركة بشكل أكبر في منظومة الكفالة. إيه اللي هتركز عليه الشراكة؟ هتدعم الشراكة مجموعة من الأنشطة، منها: برامج تدريب وورش عمل للأسر الكافلة. حملات توعية مجتمعية لتعزيز فهم الكفالة وتصحيح المفاهيم المجتمعية الخاطئة عنها. تنفيذ حملات باص الكفالة ميدانيًا في المحافظات المستهدفة. تقديم الدعم التعليمي والطبي والاجتماعي للأطفال والأسر الكافلة. تبادل الخبرات الفنية والاستشارية بين المؤسستين. مؤسستان، وخبرات متكاملة الشراكة دي مبنية على إيماننا إن التأثير الحقيقي بيكبر لما الخبرات المختلفة تتكامل. مؤسسة "يلا كفالة" بتقدم خبرتها المتخصصة في التدريب والاستشارات والتوعية بمجال الكفالة، بينما بتساهم مؤسسة "هي" بحضورها الميداني القوي، وعلاقاتها بالمجتمعات المحلية، وقدرتها على الوصول للأسر في مختلف المحافظات. ومن خلال الجمع بين نقاط القوة دي، بنقدر نوصل بشكل أفضل للمجتمعات اللي محتاجة للمعلومات والدعم بشكل أكبر، ونبني مجتمع كفالة أكثر ترابطًا وشمولًا في صعيد مصر. نقرّب الكفالة أكتر من الأسر توسيع نطاق التوعية بالكفالة مش بس معناه إننا نوصل لعدد أكبر من الناس، لكن كمان إننا نوصل للمجتمعات اللي محتاجة للمعلومات والدعم بشكل أكبر. ومن خلال الشراكة دي، بنشتغل علشان نخلي المعرفة والدعم والخدمات المرتبطة بالكفالة أقرب وأسهل وصولًا للأسر والأطفال في صعيد مصر. شراكة جديدة، وصول أوسع، وخطوة جديدة في طريقنا علشان كل طفل تكون عنده فرصة إنه ينشأ وسط رعاية وأمان وانتماء
أعلنت وزارة التضامن الاجتماعي إطلاق المرحلة الأولى من منظومة الخدمات الرقمية الخاصة بالأسر البديلة الكافلة ومؤسسات الرعاية، بالتعاون مع وزارة الاتصالات وتكنولوجيا المعلومات ، من خلال منصة خدمات الرعاية الاجتماعية بالبوابة الرقمية للوزارة. الخطوة دي بتيجي ضمن جهود الوزارة في التحول الرقمي وتطوير الخدمات المقدمة للمواطنين، بهدف تسهيل الإجراءات وتوفير تجربة أكثر وضوحًا وسرعة للأسر والأطراف المستفيدة من خدمات الرعاية الاجتماعية. لأول مرة.. رحلة الكفالة بشكل رقمي متكامل المنظومة الجديدة بتُعد أول منظومة رقمية متكاملة لميكنة إجراءات الكفالة والخدمات المرتبطة بيها. ومن خلالها، يقدر المواطن يقدم طلبه إلكترونيًا ويتابعه خلال المراحل المختلفة، بداية من الفحص والمراجعة والتحقق من البيانات، مرورًا بالتكامل مع الجهات المعنية، وحتى استكمال الإجراءات واتخاذ القرار. وده بيساعد على تقليل الإجراءات الورقية، وزيادة الشفافية، وتسريع إنجاز الطلبات. من الإجراءات الورقية.. إلى رحلة رقمية أوضح التحول الرقمي مش بس معناه تقديم الطلب أونلاين، لكنه بيشمل إعادة تنظيم وهندسة الإجراءات وتحويلها لخدمات رقمية مترابطة. وكمان تم تنفيذ عمليات ربط إلكتروني مع عدد من الجهات الحكومية، بما يسمح بتبادل البيانات والتحقق من المعلومات بشكل إلكتروني، ويقلل الحاجة لتقديم المستندات الورقية. بالإضافة إلى ذلك، تم الربط بمنظومة الهوية الرقمية علشان يقدر المواطن يدخل على المنصة بشكل آمن. إيه اللي هتقدمه المنظومة؟ المنظومة الجديدة بتساهم في: توحيد إجراءات العمل الخاصة بخدمات الكفالة. تسهيل تقديم الطلبات ومتابعتها إلكترونيًا. تعزيز دقة البيانات والتحقق منها. تقليل الاعتماد على المستندات والإجراءات الورقية. رفع كفاءة متابعة الطلبات. تحسين جودة الخدمات المقدمة للأسر البديلة الكافلة ومؤسسات الرعاية. توفير بيانات تساعد في اتخاذ قرارات أكثر دقة. خطوة لدعم الأسر وتطوير منظومة الكفالة إطلاق المرحلة الأولى من المنظومة بيمثل خطوة مهمة في تطوير خدمات الكفالة والرعاية الاجتماعية، لأنه بيساعد على جعل الإجراءات أكثر تنظيمًا ووضوحًا، وبيفتح الباب أمام منظومة رقمية متكاملة تواكب احتياجات الأسر والمستفيدين. والأهم إن التحول الرقمي يقدر يساعد في بناء تجربة أكثر سهولة للأسرة خلال رحلة الكفالة، من خلال تقليل التعقيدات الإدارية وتسهيل الوصول للمعلومات ومتابعة الإجراءات. المرحلة الأولى هي بداية لمنظومة أوسع، حيث من المقرر التوسع خلال الفترة المقبلة في إتاحة المزيد من الخدمات الرقمية ضمن منظومة خدمات الرعاية الاجتماعية. وده بيعكس التعاون المستمر بين وزارة التضامن الاجتماعي ووزارة الاتصالات وتكنولوجيا المعلومات، بهدف تطوير الخدمات وتحسين كفاءة منظومة الرعاية الاجتماعية. لأن تطوير منظومة الكفالة مش بس بيبدأ من دعم الأسرة والطفل، لكنه كمان بيبدأ من تسهيل الرحلة نفسها.
في خطوة جديدة تؤكد دور مؤسسة يلا كفالة كشريك أساسي في دعم وتطوير منظومة الكفالة في مصر، انضمت المؤسسة إلى اللجنة العليا للأسر البديلة الكافلة بوزارة التضامن الاجتماعي ، لتكون جزءًا من الجهود المبذولة لضمان المصلحة الفضلى للأطفال ودعم الأسر الكافلة. دور اللجنة العليا في منظومة الكفالة تتولى اللجنة العليا للأسر البديلة الكافلة مسؤولية إدارة منظومة الكفالة من خلال إطار يعتمد على الحوكمة والمتابعة المستمرة، حيث تختص بالنظر في طلبات الكفالة، ومراجعة أوضاع الأسر المتقدمة، ومتابعة تطبيق الإجراءات التي تضمن توفير بيئة آمنة ومستقرة للأطفال. كما تعمل اللجنة على التنسيق بين الجهات المختلفة، ومتابعة أداء اللجان المحلية، بما يساهم في تطوير المنظومة وتحسين جودة الخدمات المقدمة للأطفال والأسر. مشاركة يلا كفالة.. من الخبرة إلى صناعة القرار تمثل مشاركة مؤسسة يلا كفالة داخل اللجنة العليا خطوة مهمة، لأنها تأتي استنادًا إلى خبرة عملية ممتدة مع الأطفال والأسر الكافلة على أرض الواقع. فالمؤسسة لا تساهم فقط في التوعية ودعم الأسر خلال رحلة الكفالة، لكنها أصبحت أيضًا جزء من الحوار وصناعة القرارات المتعلقة بتطوير المنظومة، من خلال المشاركة في مناقشة التحديات وطرح الحلول التي تحقق مصلحة الطفل. أدوار مؤسسة يلا كفالة داخل اللجنة من خلال عضويتها في اللجنة العليا، تساهم مؤسسة يلا كفالة في: المشاركة في مناقشة القرارات الخاصة بمنظومة الكفالة. المشاركة في التصويت على القرارات ضمن أعضاء اللجنة. نقل الخبرات والتجارب الواقعية للأسر الكافلة والأطفال من أرض الواقع. المساهمة في تطوير آليات دعم ومتابعة الأسر الكافلة. التعاون مع وزارة التضامن الاجتماعي والجهات المعنية لتعزيز جودة منظومة الكفالة. شراكة هدفها طفل أكثر أمانًا نؤمن أن تطوير منظومة الكفالة يحتاج إلى تعاون حقيقي بين جميع الأطراف، وأن تكامل دور الدولة مع مؤسسات المجتمع المدني يخلق فرص أكبر لحماية الأطفال ودعم الأسر. انضمامنا إلى اللجنة العليا هو مسؤولية جديدة نعتز بها، وفرصة للاستمرار في العمل من أجل منظومة كفالة أكثر دعمًا واحتواءً، تضع مصلحة الطفل دائمًا في المقام الأول. لأن كل طفل يستحق بيتًا.
في إطار حرص مؤسسة يلا كفالة على التطوير المستمر وتعزيز أثرها في ملف الكفالة والرعاية الأسرية البديلة، نظّم فريق المؤسسة ورشة عمل متخصصة لإعداد الاستراتيجية المؤسسية للفترة 2026–2028 . قدّم الورشة الأستاذ سامح مروان ، مستشار المتابعة والتقييم، حيث قاد الفريق خلال جلسات عمل ركزت على بناء رؤية استراتيجية واضحة للسنوات الثلاث القادمة، بما يتماشى مع رسالة المؤسسة وأهدافها طويلة المدى. شهدت الورشة مناقشات حول أولويات المؤسسة خلال المرحلة المقبلة، وتحديد الأهداف الاستراتيجية، وآليات قياس الأثر، إلى جانب تطوير خطط العمل بما يضمن تحقيق نتائج أكثر استدامة في دعم منظومة الكفالة. كما أتاحت الورشة مساحة لتبادل الأفكار بين أعضاء الفريق، ومراجعة الإنجازات السابقة، والبناء عليها لرسم ملامح المرحلة القادمة. رؤية مشتركة للمستقبل إعداد استراتيجية واضحة لا يقتصر على وضع خطط على الورق، بل هو خطوة أساسية لضمان أن تظل جميع جهود المؤسسة متجهة نحو هدف واحد: توفير بيئة أكثر دعمًا للأطفال فاقدي الرعاية والأسر الكافلة، وتعزيز الوعي المجتمعي بقضية الكفالة. في مؤسسة يلا كفالة، بنؤمن أن التخطيط الجيد هو البداية الحقيقية لأي أثر مستدام، وأن الاستثمار في تطوير المؤسسة هو استثمار في مستقبل كل طفل نسعى للوصول إليه.
تشرفت مؤسسة يلا كفالة بالمشاركة في الندوة التي نظمها المجلس القومي للطفولة والأمومة بالتعاون مع هيئة إنقاذ الطفولة بمكتبة القاهرة الكبرى، واللي جمعت ما بين مسؤولين وخبراء ومؤسسات مجتمع مدني وجميع الأطراف المهتمة بملف الكفالة والرعاية الأسرية البديلة. مساحة للحوار الحقيقي حول التحديات اللي ميّز الندوة هي أنها ماكنتش تقتصر بس على الكلام عن الإنجازات والأرقام، بالعكس فتحت مساحة صادقة لمناقشة التحديات اللي بتواجه الأسر الكافلة بكل شفافية أمام المسؤولين. وكان الهدف هو الوصول لحلول حقيقية تضمن مصلحة الطفل وتدعم الأسر خلال رحلتها في الكفالة. من أرض الواقع.. تجارب تصنع الفرق جاءت مشاركة مؤسسة يلا كفالة مختلفة، لأنها انطلقت من خبرة عملية وتجارب حقيقية مع الأسر الكافلة يوم بعد يوم، مش بس من خلال أوراق أو استراتيجيات مكتوبة. وانعكس ده في كلمات مسؤولي المؤسسة والأمهات الكافلات المشاركات في الندوة، حيث قدمت نماذج نجاح حقيقية لمنظومة الكفالة، وشاركوا رحلتهم بكل ما فيها من حب وتحديات وانتماء. وكانت قصصهم محل تقدير وإعجاب من كل الحضور. كفالة الأطفال والشباب الأكبر سنًا.. نقاش مهم فتحت مؤسسة يلا كفالة كمان نقاش مهم حول كفالة الأطفال والشباب الأكبر سنًا، وهو موضوع عادة لا يتم التطرق إليه رغم أهميته. ومن خلال تجربة حقيقية، ناقشنا معنى أن طفل/شاب كبير يلاقي أسرة تحتويه، وإزاي الكفالة ممكن تغيّر حياته وحياة الأسرة نفسها، وكل ما تحمله الرحلة دي من تحديات وإنجازات. وكان الحديث مليان بالمشاعر الصادقة اللي وصلت لكل الحاضرين. كل قصة كفالة هي رسالة أمل في مؤسسة يلا كفالة، نؤمن أن كل قصة كفالة ناجحة هي رسالة أمل، وأن كل تحدٍ يُطرح بوضوح هو خطوة حقيقية تجاه التغيير. ونتمنى أن التوصيات اللي خرجت بيها الندوة تتحول إلى خطوات عملية على أرض الواقع، لأن هدفنا كلنا واحد: أن كل طفل يلاقي بيت يحتويه، وأسرة تديله الحب والانتماء اللي يستحقه.
في خطوة مهمة لنشر الوعي بقضية الكفالة وسط الشباب، نظّمت مؤسسة يلا كفالة صالونًا ثقافيًا داخل الجامعة الأمريكية (AUC) بالتجمع، بحضور عدد كبير من الطلاب المهتمين بالعمل على القضايا المجتمعية والمناصرة. خلال اللقاء، تم تقديم محاضرة تناولت: مفهوم الكفالة وأهميتها - دور مؤسسة يلا كفالة في دعم منظومة الكفالة - مراحل رحلة الكفالة - التحديات اللي بتواجه الأسر الكافلة - أهمية التوعية المجتمعية في دعم الأطفال فاقدي الرعاية الوالدية وكان الهدف إن الطلاب يفهموا القضية بشكل أعمق، بعيد عن الصور النمطية أو المعلومات غير الدقيقة. قصص حقيقية من أرض الواقع واحدة من أهم لحظات الصالون كانت مشاركة نماذج حقيقية من داخل المنظومة، ومنها: - فادية يعقوب كنموذج لأم كافلة ومن فريق "يلا كفالة" شاركت تجربتها الإنسانية وتفاصيل رحلتها مع الكفالة - فاتن وليد كأول شابة مكفولة في مصر بعد سن العشرين ومن فريق "يلا كفالة" بتحكي تجربتها وقصتها بشكل واقعي ومُلهم وجود قصص حقيقية قدام الطلاب خلق مساحة أكبر للفهم والتفاعل، وخلى الحوار أقرب وأكثر تأثيرًا. خطوة مهمة داخل الجامعات إقامة الصالون الثقافي داخل الجامعة الأمريكية كانت خطوة كبيرة في طريق نشر الوعي بالكفالة داخل الجامعات، والوصول لشباب مهتم بالفعل بالمناصرة والعمل المجتمعي. كما ساهم اللقاء في: - حشد عدد أكبر من الطلاب لدعم القضية - تشجيع الشباب على التطوع مع مؤسسة يلا كفالة - خلق مساحة للحوار حول حقوق الأطفال فاقدي الرعاية وأهمية دعم الأسر الكافلة. حضور عدد كبير من الطلاب وتفاعلهم مع النقاشات والقصص الإنسانية أكد إن الشباب عندهم استعداد حقيقي للفهم والمشاركة والتغيير. وفي مؤسسة يلا كفالة، بنؤمن إن بناء وعي حقيقي جوه الجامعات هو خطوة أساسية لبناء مجتمع أكثر دعمًا واحتواءً للأطفال والأسر الكافلة.
Beyond the Diagnosis… مساحة صادقة لصحة المرأة والأمومة والكفالة في أجواء خاصة بمناسبة عيد الأم، تستضيف مؤسسة يلا كفالة فعالية Beyond the Diagnosis في أمريكا لقاء إنساني يجمع بين التوعية، الدعم، والاحتفاء برحلة المرأة بكل تفاصيلها. الفعالية بتجمع أكثر من 50 سيدة من الأمهات، والمهنيات، والمهتمات بالصحة، وأفراد من المجتمعات العربية والمسلمة في منطقة Bay Area سان فرانسيسكو، في مساحة مليانة حوار حقيقي، تواصل، واحتفال بالمرأة في كل مراحل رحلتها. اللقاء بيركّز على جوانب مختلفة من صحة المرأة، بداية من صحة الفم والأسنان وعلاقته بصحة الجسم بالكامل، مرورًا بتجربة بطانة الرحم المهاجرة (Endometriosis)، ووصولًا لفكرة الأمومة والكفالة. وفي مجتمعات كتير، خصوصًا وسط النساء اللي بيمروا بتحديات صحية مرتبطة بالحمل أو الخصوبة أو التغيرات الجسدية المختلفة، بيكون من النادر وجود مساحة آمنة وصادقة للكلام عن "ما بعد التشخيص". ومن هنا جاءت فكرة Beyond the Diagnosis… لتحويل الحديث من الخسارة إلى الأثر، ومن الألم إلى الحكايات اللي بتخلق معنى جديد للحياة. حوار يجمع تجارب مختلفة في قلب الفعالية، جلسة حوارية خاصة تجمع بين ثلاث سيدات لكل واحدة منهن رحلة وتجربة مختلفة: د. نشوى عزيز الرشيدي ، الشريكة في The Diablo Dental Group، والمتخصصة في طب الأسنان البيولوجي وعلاقة صحة الفم بصحة الجسم. د. منى عرادي ، مؤسسة The Orady Women’s Clinic، ومن أبرز المتخصصات في علاج بطانة الرحم المهاجرة والجراحات النسائية الدقيقة. رشا مكي ، مؤسسة يلا كفالة، واللي قادتها رحلتها من عدم القدرة على الإنجاب إلى الأمومة من خلال الكفالة، ثم إلى إطلاق حركة دعمت آلاف الأطفال في مصر للحصول على بيوت آمنة من خلال نظام الكفالة. الجلسة تتناول رحلة المرأة من الجسد… إلى القلب… إلى البيت، والمسارات المختلفة اللي ممكن تمر بيها كل امرأة. أكثر من مجرد لقاء Beyond the Diagnosis مش مجرد فعالية توعوية، لكنها تجربة متكاملة مليانة تفاصيل دافئة ومقصودة، منها: ركن لتنسيق الزهور وتصميم باقات خاصة مشروبات القهوة والماتشا مع Brunch Bites جلسة أسئلة وإجابات لتصحيح المفاهيم حول صحة المرأة والكفالة هدايا خاصة لكل الحاضرات مساحة للدعم، الحوار، والتواصل الحقيقي لأن كل رحلة تستحق أن تُروى الفعالية بتؤمن إن رحلة المرأة بكل ما فيها من تحديات، تغيّرات، وأشكال مختلفة للأمومة تستحق مساحة آمنة تُسمَع فيها الحكايات بدون خوف أو أحكام. بالنسبة لمؤسسة يلا كفالة، مشاركة زي Beyond the Diagnosis ما كانتش مجرد فعالية، لكنها امتداد طبيعي لرسالتنا في دعم المرأة، والأمومة، وخلق مساحات آمنة للحوار حول الرحلات المختلفة اللي ممكن تمر بيها كل سيدة.وجود الكفالة ضمن النقاشات الخاصة بصحة المرأة وتجاربها الإنسانية بيساعد إن المجتمع يشوف الكفالة بشكل أعمق وأكثر إنسانية مش كحل بديل فقط، لكن كرحلة أمومة حقيقية مليانة حب واحتواء وأثر. الحدث كان فرصة مهمة إن صوت الأمهات الكافلات يوصل لمساحات جديدة، وإن قصص الكفالة تبقى جزء من حوار أكبر عن المرأة، الصحة، والأسرة، وده بيتماشى مع رؤية يلا كفالة في بناء وعي مجتمعي أكثر دعمًا وتفهّمًا للأطفال والأسر الكافلة.
يوم Team Building… لما القيادة تبقى فهم مش مجرد دور في مؤسسة يلا كفالة، بنؤمن إن الشغل الحقيقي مش بس في اللي بنقدمه… لكن كمان في إزاي فريقنا بيشتغل سوا. ومن هنا، كان عندنا جلسة Team Building لمدة ساعتين داخل المكتب، ركزت بشكل أساسي على مفهوم القيادة ودورها داخل المؤسسات. الجلسة ما كانتش مجرد تدريب نظري، لكنها فتحت نقاش حقيقي حوالين: - يعني إيه تكون قائد؟ - وهل القيادة مرتبطة بمسمى وظيفي؟ - وإزاي كل فرد في الفريق يقدر يكون ليه دور قيادي حتى من غير منصب؟ واتفقنا إن القيادة مش لقب… لكنها تأثير، مسؤولية، وقدرة على دعم اللي حواليك. نقاش يفتح زوايا جديدة خلال الجلسة، تم طرح أفكار وتجارب ساعدت الفريق إنه: - يشوف دور القيادة بشكل أعمق - يفهم تأثيره داخل الفريق - يستوعب إزاي يقدر يساهم في خلق بيئة عمل صحية ومتعاونة الموضوع ماكانش تدريب تقليدي… لكنه كان مساحة لفهم حقيقي وتبادل خبرات. ليه ده مهم؟ لأن أي مؤسسة ناجحة محتاجة فريق: - فاهم دوره - عنده وعي بطريقة تأثيره - وقادر يتحمل مسؤولية حتى في التفاصيل الصغيرة وده جزء أساسي من بناء بيئة شغل قوية ومستقرة. رغم إن الجلسة كانت مدتها ساعتين، لكن تأثيرها بيظهر في طريقة تفكيرنا وتواصلنا كل يوم. لأن في الآخر… القيادة مش منصب بنتعيّن فيه، لكنها طريقة بنشتغل ونفكر بيها.
مشاركة مؤسسة يلا كفالة في مؤتمر تطوير منظومة الأسر الكافلة شاركت مؤسسة يلا كفالة في فعالية امتدت لثلاثة أيام ضمن مؤتمر أُقيم تحت رعاية وزيرة التضامن الاجتماعي مايا مرسي، وبقيادة الدكتور وائل عبد العزيز رئيس الإدارة المركزية للرعاية، والأستاذ علاء عبد العاطي مدير الرعاية المؤسسية. ناقش اللقاء عددًا من المحاور المهمة التي تهدف إلى تطوير منظومة الأسر الكافلة وتعزيز دعمها بما يحقق المصلحة الفضلى للأطفال. التدريب الإلزامي والتحول الرقمي في منظومة الكفالة تناول المؤتمر اعتماد التدريب الإلزامي الوطني للأسر الكافلة، حيث تُعد مؤسسة يلا كفالة شريكًا أساسيًا في تنفيذ هذا التدريب. كما ناقش الحضور التحول الرقمي لمنظومة الكفالة بهدف تسهيل الإجراءات، وضمان جودتها، وتقديم خدمات أكثر كفاءة للأسر الكافلة بما يدعم استقرار الأطفال ويحقق أفضل مصلحة لهم. إلى جانب ذلك، تم التطرق إلى الجوانب القانونية المرتبطة بسياسات وإجراءات الكفالة، ودور اللجنة العليا واللجان المحلية في تنظيم ومتابعة المنظومة. دور التوعية المجتمعية في نشر ثقافة الكفالة خلال الفعالية، ألقت الأستاذة شيماء عباس مسؤولة التعاون الوزاري بمؤسسة يلا كفالة كلمة استعرضت فيها رؤية ورسالة مؤسسة يلا كفالة، مؤكدة أهمية التوعية المجتمعية في دعم الأطفال وتعزيز فهم المجتمع لمنظومة الكفالة. كما سلطت الضوء على مبادرة “أتوبيس الكفالة” كأحد الأدوات المهمة لنشر الوعي بثقافة الكفالة والوصول إلى فئات مختلفة من المجتمع. قصص ملهمة من الأسر الكافلة شهدت الفعالية أيضًا عرض نماذج إنسانية ملهمة من الأسر الكافلة. ومن بينها كلمة الزميلة فادية بصفتها أمًا كافلة ومنسق دعم مجتمعي بمؤسسة يلا كفالة، حيث شاركت تجربتها الإنسانية مع الحضور. كما تم عرض نشاط “صورة في حكاية” الذي يسلّط الضوء على قصص وتجارب حقيقية من رحلة الكفالة، وقد لاقى النشاط تفاعلًا كبيرًا ورسائل دعم واسعة للأسر الكافلة. تفخر مؤسسة يلا كفالة بمشاركتها المستمرة في دعم وتطوير منظومة الكفالة في مصر، والعمل جنبًا إلى جنب مع شركائها من الجهات الحكومية والمجتمع المدني. ويظل الهدف المشترك هو بناء مستقبل أكثر أمانًا واحتواءً لكل طفل من خلال تعزيز منظومة الأسر الكافلة وتوسيع دائرة الدعم المجتمعي له.
إطلاق YK TV… رحلة جديدة لفهم الكفالة في مؤسسة يلا كفالة، دايمًا هدفنا نفهم الأسر الكافلة كل التفاصيل ونقدملهم دعم حقيقي. ومن هنا جه YK TV، مساحة جديدة للإجابة عن كل أسئلة الكفالة بشكل واقعي وبسيط. ليه YK TV؟ - مكان آمن للإجابات - لقاءات مع متخصصين - نقاشات عن تحديات حقيقية - توعية مبنية على خبرة وتجربة كل حلقة معمولة علشان تساعد الأسر، تطمنهم، وتديهم فهم أعمق. YK TV خطوة جديدة لتقريب الصورة، بين السؤال والإجابة، وبين القلق والاطمئنان. ودي مجرد بداية… لأن رحلة الكفالة تستاهل نفهمها صح ما هي YK TV؟ YK TV هي منصة على اليوتيوب من مؤسسة يلا كفالة تقدم قصص حقيقية، نصائح خبراء، وإرشادات عملية عن رحلة الكفالة. هدفها مساعدة الأسر على الفهم، التعلم، والشعور بالدعم. في كل حلقة، YK TV تجاوب على الأسئلة المتكررة، وتتناول التحديات الواقعية، وتمنح الأسر المعرفة والثقة اللي محتاجينها.
نجاح الإيفينت كان واضح في ردود فعل الأسر. الابتسامات، الارتياح، والإحساس بالأمان كانوا أكبر دليل إن اليوم كان مؤثر وناجح، وإن الأسر خرجت مبسوطة وحاسة إنها مسموعة ومدعومة. Kafala is Love مش مجرد اسم إيفينت، هو رسالة بنحاول نعيشها كل سنة بشكل أعمق، علشان الكفالة في الأساس… حب، أمان، ومشاركة حقيقية
باص الكفالة المرة دي كان مختلف… لأنه كان في مكان جديد (نادي المعادي الرياضي واليخت) ومع جمهور جديد كمان. وماكانش موجّه للكبار بس، لكن للأطفال كمان، وده كان نقطة تحول حقيقية في مشوار باص الكفالة. لأن التوعية مش للجيل الكبير فقط، لكن كمان للجيل الصغير اللي ليه دور مهم في نشر الوعي والمشاركة… في النوادي، المدارس، وكل مساحة حوالينا. اتفاجئنا بتفاعل الأطفال، وبآرائهم عن أصحابهم المكفولين، وإزاي بدأوا يشجعوا غيرهم يتعاملوا معاهم بطريقة صحيحة، بناءً على التوعية اللي حصلت خلال إيفنت باص الكفالة. فخورين جدًا إننا قدرنا نحقق الخطوة دي سوا…
مشاركة مؤسسة يلا كفالة في مؤتمر CSM’70 بمقر الأمم المتحدة شاركت رشا مكي، مؤسسة مؤسسة يلا كفالة، في مؤتمر CSM’70 الذي انعقد في مقر United Nations بمدينة New York، ويُعد من أكبر التجمعات العالمية التي تجمع قادة الدول وصنّاع القرار والخبراء ومنظمات المجتمع المدني لمناقشة قضايا وحقوق المرأة. محاور المؤتمر ركز المؤتمر هذا العام على قضية محورية، وهي: - ضمان وتعزيز وصول جميع النساء والفتيات إلى العدالة. - مناقشة التحديات التي تواجه النساء على المستوى العالمي. - طرح حلول وسياسات تدعم تحقيق العدالة والمساواة. أهمية مشاركة مؤسسة يلا كفالة تمثل مشاركة مؤسسة يلا كفالة في هذا الحدث الدولي خطوة مهمة نحو: - تسليط الضوء على حقوق الأمهات الكافلات. - التأكيد على أهمية توفير بيئة آمنة وعادلة للأطفال المكفولين وفاقدي الرعاية. - نقل التجربة المصرية في دعم منظومة الكفالة إلى منصة دولية. نحو توافق مع رؤية مصر 2030 تأتي هذه المشاركة في إطار سعي المؤسسة إلى: - التوافق مع مستهدفات رؤية مصر 2030 - تعزيز حضور قضايا الكفالة على المستوى الدولي. - بناء جسور تواصل مع الجهات العالمية المعنية بحقوق المرأة والطفل.
أنشطة بتجمع الأسر والأطفال خلال اليوم، تم تنفيذ أنشطة وألعاب مختلفة جمعت: - الأسر مع أولادهم - الأطفال مع بعضهم - لحظات مشتركة مليانة ضحك وتفاعل الهدف كان إن الإيفينت يبقى تجربة إنسانية، مش مجرد يوم ترفيهي، ويخلق مساحة حقيقية للتواصل بين أفراد الأسرة مساحة خاصة للأمهات… واهتمام بكل فرد من أهم محطات اليوم كانت ورشة الأمهات، اللي ركزت على التعامل مع الصدمات النفسية، واتخصص لها وقت منفصل للأمهات لوحدهم، في مساحة آمنة يقدروا يتكلموا ويشاركوا تجاربهم براحة. وفي نفس الوقت: - كان فيه وقت مخصص للآباء مع أولادهم - ووقت منفصل للأطفال مع بعض التقسيم ده ساعد كل فرد ياخد المساحة اللي محتاجها فعلًا
لما الفريق يختبر الرحلة بنفسه… يوم تدريبي مختلف في مؤسسة يلا كفالة في مؤسسة يلا كفالة، إحنا مؤمنين إن الدعم الحقيقي للأسر الكافلة مش بس في الإجابة على الأسئلة أو إرشادهم بالأوراق… لكن في إننا نفهم الرحلة زيهم، ونعيش تفاصيلها، ونحس تحدياتها. وعلشان كده، فريق يلا كفالة أخد مؤخرًا التدريب الإلزامي اللي بتاخده الأسر الكافلة خلال رحلة الكفالة. التدريب ده بيعتبر خطوة أساسية لأي أسرة بتستعد تستقبل طفل في بيتها، وبيغطي جوانب: نفسية اجتماعية عملية مهمة جدًا للأسر والأطفال ليه الفريق أخد التدريب؟ لأن المؤسسة هي الجهة اللي بترافق الأسرة في الرحلة من أول خطوة… وبالتالي لازم يكون الفريق: فاهم مراحل الرحلة عارف التحديات اللي بتقابل الأسر مدرك للأسئلة اللي بتدور في عقلهم ومطلع على الأدوات اللي بتساعدهم لما الفريق يختبر التدريب بنفسه، ده بيحوله من مجرد "مُرشِد" إلى شريك فاهم ومسؤول بوعي. الدعم مش معلومة… الدعم فهم وجود الفريق في التدريب كان هدفه الأساسي إن أي أسرة تتواصل معانا تلاقي: حد فاهم هما بيمروا بإيه وحد يعرف يكمل معاهم بجد وحد يقدّم دعم فعال مش شكلي الرحلة بتاعة الكفالة إنسانية في المقام الأول…وعشان كده لازم اللي بيساعد → يكون فاهم الإنسان اللي قدامه قبل أي شيء. في يلا كفالة، بنشتغل علشان المنظومة كلها تبقى أقوى: بتبدأ من الأسرة وتمر بالطفل وبتعدّي حتمًا من خلالنا
Kafala is Love… لما الكفالة تبقى مساحة أمان وحب إيفينت Kafala is Love دايمًا بيكون واحد من أقرب الفعاليات لقلوبنا في يلا كفالة. بنعمله كل سنة علشان نجمع الأسر الكافلة والأطفال في مساحة واحدة مليانة حب، دعم، وذكريات حلوة. لكن السنة دي كانت مختلفة… وأقرب أكتر. اختلاف مبني على شراكات حقيقية الاختلاف المرة دي كان واضح من البداية. الايفينت اتعمل بالتعاون مع جامعة MSA ومؤسسة لبلدنا، وده أضاف بعد جديد للتجربة، وخلى اليوم أكثر تنظيمًا، وأكتر وعيًا باحتياجات الأسر، وأقرب لروح الدعم الحقيقي.
ليه يوم باص الكفالة كان مهم؟ لأنه: - فتح باب جديد مع الشباب - بنى تحالف مهم مع مؤسسة لبلدنا - قدّم حقائق مباشرة من أهل التجربة - واجه المعتقدات المغلوطة - ودّى صورة واضحة للجيل اللي هيقود بكرة النهارده كان أكتر من حدث… كان خطوة في اتجاه مجتمع فاهم يعني إيه كفالة، ومسؤوليتها، وإنسانيتها. وباص الكفالة ماكانش مجرد رحلة… كان بداية وعي جديد، وجيل جديد، وشراكات جديدة … علشان المنظومة كلها تكبر، والأطفال المكفولين يكبروا وسط بيئة أأمن وأوعى.
في مؤسسة يلا كفالة، دايمًا بنؤمن إن التفوق لازم يتشاف ويتكافئ، وإن أي طفل يبذل مجهود ويحقق نجاح يستاهل دعم حقيقي يشجعه يكمل الطريق. النهارده كان يوم مميز، سلّمنا فيه الدفعة الأولى من التابلت للأطفال المكفولين المتفوقين في مجالات مختلفة: دراسيًا رياضيًا حفظ القرآن الكريم التكريم ده مش مجرد جهاز…هو رسالة واضحة للأطفال: تعبكم متشاف، ومجهودكم مقدّر، ومستقبلكم مهم. الدفعة الأولى… وبداية مكملة تم تسليم التابلت لـ ٧ أطفال في الدفعة الأولى النهارده، وده جزء من خطة مستمرة لدعم وتشجيع الأطفال المكفولين على التميز في كل المجالات. والأجمل إننا مستنيين الدفعة التانية الأسبوع الجاي ، علشان نوصل الدعم لأكبر عدد ممكن من الأطفال ونكمل تشجيعهم على النجاح. في مؤسسة يلا كفالة، بنشوف التفوق كفرصة لازم نكبرها، ونؤمن إن الاستثمار الحقيقي دايمًا بيبدأ من الطفل… لما نحسسه إن في حد شايفه، ومصدق فيه، وواقف جنبه.
لما الدراما تفتح باب مهم للنقاش: يعني إيه كفالة فعلًا؟ في رمضان اللي فات، مسلسل “حكاية نرجس” عمل حالة جدل كبيرة، وخلّى ناس كتير تتكلم وتفكر في موضوع حساس ومهم: كفالة الأطفال. القصة بتدور حوالين “نرجس”، ست بتعاني من ضغط المجتمع بسبب عدم الإنجاب، وبتحاول مع جوزها يكفلوا طفل. لكن لما طلبهم اترفض، ما وقفتش عند كده، واتجهت لطريق مظلم جدًا، ووصلت إنها تخطف أطفال علشان تعيش إحساس الأمومة حتى لو على حساب أمهات تانية وأطفالهم. القصة دي، رغم إنها درامية، لكنها فتحت أسئلة حقيقية: - ليه في طلبات كفالة بتترفض؟ - وهل الرفض ممكن يبرر رد فعل بالشكل ده؟ الكفالة مش تعويض… الكفالة حق للطفل مهم جدًا نوضح إن الكفالة مش وسيلة لحل علشان نحقق رغبة شخصية في الأمومة أو الأبوة. الكفالة في الأساس هي حق للطفل طفل محتاج يعيش في بيت آمن، وسط أسرة تقدر توفر له حب واستقرار. علشان كده، قرار اختيار الأسرة الكافلة مش قرار سهل، لأنه مش بس متعلق برغبة الكبار، لكن بمستقبل طفل كامل. ليه في شروط للكفالة؟ وجود شروط ومعايير مش الهدف منه التعقيد أو الرفض، بالعكس ده علشان نحمي الطفل ونضمن إنه يروح لأسرة مناسبة. بيتم تقييم الأسرة بشكل شامل، من حيث: - استقرارها الاجتماعي والاقتصادي - حالتها النفسية والصحية -وعيها وتعليمها - قدرتها على الاحتواء والتربية كل ده علشان نضمن إن الطفل هيكبر في بيئة آمنة ومستقرة. الطفل المكفول… احتياجاته مختلفة الطفل اللي داخل نظام الكفالة بيكون غالبًا مرّ بتجربة فقد أو انفصال بدري، وده بيأثر عليه نفسيًا. علشان كده هو محتاج: - حد يسمعه ويفهمه لما يسأل عن أصله - أسرة تساعده يتقبل هويته، مش تخبيها - دعم حقيقي مشروطش بصورة أو توقعات ومع الوقت، خصوصًا في المراهقة، بيكون محتاج صبر وحب غير مشروط أكتر من أي وقت تاني. هل نرجس كانت مستعدة فعلًا؟ قصة نرجس بتخلينا نسأل: - هل كانت فعلًا جاهزة للكفالة؟ - هل كانت هتتقبل الطفل بهويته الحقيقية؟ - هل كانت هتقدر تواجه المجتمع وتدعمه؟ الإجابات دي بتوضح إن الكفالة مش بس رغبة… دي مسؤولية كبيرة محتاجة وعي واستعداد حقيقي. محتاجين نفهم الكفالة بشكل أعمق وده جزء من دورنا كمؤسسة "يلا كفالة" التحدي الحقيقي مش البداية… الاستمرار الكفالة مش خطوة بنبدأها وخلاص، دي رحلة طويلة. وأصعب جزء فيها مش إننا نستقبل الطفل، لكن إننا نكمل معاه في كل مراحله حتى الصعبة منها. لأن أخطر حاجة على الطفل هي إنه يتساب تاني، بعد ما يكون حس بالأمان. دور "يلا كفالة" في منظومة الكفالة هو: - تسهيل إجراءات الكفالة على الأسر بالتعاون مع وزارة التضامن الاجتماعي. - تقديم التدريب الإلزامي لكل الأسر اللي بتقدم على الكفالة. - المشاركة في تغيير القوانين لصالح منظومة الكفالة بما يتماشى مع المصلحة الفضلى للطفل. - توعية المجتمع والأسر بمفهوم الكفالة. في مصر، نظام الكفالة اتطور بشكل كبير علشان يحقق توازن بين حماية الأطفال ودعم الأسر. لكن الأهم من القوانين هو الوعي. كل ما فهمنا الكفالة بشكل صح، كل ما قدرنا نوفر للأطفال فرص أفضل يعيشوا في أسر مناسبة. وفي النهاية مسلسلات زي “حكاية نرجس” بتفتح باب للنقاش، وده شيء مهم. لكن دورنا إننا نكمل النقاش ده بوعي وفهم أعمق. علشان في الآخر، الكفالة مش مجرد إننا ندي طفل بيت… لكن إننا نديه حياة آمنة يستحقها.
ألعاب… حوار… واكتشاف فجوة مهمة خلال ايفينت باص الكفالة، لعبنا مع الطلاب ألعاب تفاعلية، وسمعنا منهم بوضوح: معتقداتهم، مخاوفهم، وأفكارهم عن الكفالة. الهدف ماكنش مجرد نشر معلومات… الهدف كان نفهم الـ Gap — الفجوة اللي بين الوعي الحالي والوعي المطلوب. ولما بنسمع الطلاب بنفسنا، بنشوف الصورة الحقيقية: فين الخلل؟ فين الاستعداد؟ فين النقاط اللي لازم نشتغل عليها؟ وده اللي بيخلي الخطوة دي مختلفة… لأنها مبنية على واقع صلب، مش افتراضات. جلسة حوارية… بكل الأصوات اللي لازم تتسمع اليوم اختتم بجلسة حوارية قوية جمعت كل أطراف المنظومة: - الإعلامية دعاء فاروق - رشا مكي: مؤسسة يلا كفالة - مصطفى: ابن رشا المكفول - محمد: أب بيولوجي وأب كافل - د. حسن خليل: أحد المشايخ ممثلًا للجانب الشرعي - فاتن وليد: خريجة دار ومكفولة في سن كبير - انجي منصور: مؤسسة لبلدنا المشهد نفسه كان رسالة: هي دي الكفالة… ناس حقيقية، تجارب حقيقية، قصص حقيقية. الجلسة ناقشت: - دور المؤسسات - التعاون بين الجهات - تصحيح المفاهيم الدينية - نقل تجارب من أرض الواقع - وتحديات الأسر الكافلة وده اللي بيخلق وعي حقيقي مش مبني على سماع… لكن مبني على وجود قصص حقيقية أمامك.
باص الكفالة: خطوة جديدة… ورسالة أبعد من رحلة في يلا كفالة، دايمًا كان "باص الكفالة" واحد من أهم الوسائل اللي بنستخدمها علشان نقرب الناس من منظومة الكفالة، ونفتح حوار حقيقي عن معناها، تأثيرها، والمسؤولية اللي كل فرد ممكن يشيلها تجاه الأطفال المكفولين. لكن المرة دي… كانت مختلفة تمامًا. ليه مختلفة؟ لأن الرسالة راحت لجيل المستقبل لأول مرة، قررنا إن باص الكفالة يخاطب جيل الـ Gen Z تحديدًا. الجيل اللي هيكبر، وهيمسك أماكن قيادية، وهيبقى ليه الدور الأكبر في تشكيل وعي المجتمع بكرة. وده معناه إن الاستثمار في وعيهم النهارده هو استثمار مباشر في مستقبل منظومة الكفالة. وبدأنا الرحلة من جامعة MSA بالشراكة مع مؤسسة لبلدنا — شراكة مهمة بتفتح باب جديد للتوعية المجتمعية المنظمة، وبتحط أساس حقيقي للتغيير. أول شراكة معلنة… بداية مرحلة أكبر من قلب الجامعة، وفي وسط الطلبة، أعلنّا أول شراكة رسمية مع لبلدنا . شراكة بتقول إن الوعي مش دور جهة واحدة، وإن قوة المنظومة بتكبر لما مؤسسات مختلفة تتعاون، وتتشارك نفس الهدف الإنساني
"كنت مقررة إني هختارها بشرتها بيضة زيي عشان تكون قريبة مني ومتتعبش لما تكبر عشان اختلاف لون البشرة". أنا اسمي هبه، آنسة، بشتغل صيدلانية، وعندي ٤٠ سنة، كان حلم عمري أكون أم ولكن ربنا لم يقدر لي الزواج، وكان نفسي أكفل بنوتة عندي في البيت بس القانون مكنش بيسمح إن الآنسات تكفل. عرفت إن القانون فتح الكفالة للآنسات لما شوفت فيديوهات لمروة وياسمينا اللي إدوني أمل جديد في الحياة، وأخدت الخطوة على طول. قدمت ورقي والحمد لله تم القبول والجميل في الأمر إن الموافقة جتلي يوم عيد الحب ١٤/٢/٢٠٢١، وكان أجمل يوم في حياتي. كنت عايزة أكفل بنوتة صغيرة عشان أعيش معاها كل لحظات حياتها، أول ضحكة، أول سنة، أول مشية، أول كلمة ماما، وكنت مقررة إني هختارها بشرتها بيضة زي عشان تكون قريبه مني ومتتعبش لما تكبر عشان اختلاف لون البشرة، ويشاء رب العالمين إنها تكون سمرة وتكون من الصعيد كمان، وكأن ربنا بيقولي أنا اللي بختار ليكي مش إنتي، وكانت أحلى اختيار لله عز وجل اللي رزقني بمريم. والحمد لله من يوم ما دخلت البيت ملته سعادة وحب وهنا ورجعت لينا الحياة وبقى عندي هدف أعيش علشانه وبقى عندي أمل في الحياة وبدعي دايمًا ربنا يقدرني إني أربيها على الوجه الذي يرضاه ويحبه.
"كنت بخاف أروح السبوع بتاع أي طفل يتولد في العيلة وأبارك خوفًا من نظرات الناس ليا أو خوفهم من الحسد لإني عقيم مبخلفش". مر على زواجي ١٠ سنين من غير أطفال. كنت بحلم إن يبقى عندي طفل يملا عليا حياتي. في مره لمحت ست قاعده مع ابنها الصغير بتأكله وبتلاعبه، فسرحت فيهم واتخيلت إن ممكن يجي عليا يوم وأعيش نفس الإحساس ده. عرضت علي جوزي كتير أوي إنه يتجوز ويخلف ويبقى عنده أولاد لكنه كان دايمًا بيرفض. وفي يوم من الأيام قريبة جوزي كفلت بنوتة أمورة ما شاء الله، أول ما شفتها قلبي إنشق نصين، والدموع نزلت لوحدها، ومن وقتها منعت الأكل، وعشت أسبوع كامل دماغي مشغولة بالموضوع ده، لغاية ما في يوم سجلت بياناتي أنا وجوزي علي سبيل الهزار، لكن قدرة الله فوق كل شيء، لأن في نفس الأسبوع اتصلوا بيا وزارة التضامن الاجتماعي وقالولي حضري أوراقك وقدمي في الشئون. الفرحه ماكانتش سايعاني. قولت لجوزي لكنه رفض. فضلت وراه لحد ما وافق وقالي خدي رأي العيلة، طلعت لحماتي قولتلها برضه رفضت وقالتلي مسئولية، قولتلها ربنا شايف إن أحنا قدها عشان كده هيكتبهالنا إن شاء الله واقنعتها ووافقت. والحمدلله الإجراءات كانت سهلة جدًا واستلمت ابني وكان عنده ١٠ شهور، ودلوقتي ما شاء الله عنده ٣ سنين، وكل اللي كانوا رافضين هم أكتر ناس متعلقين بمصطفى وبيحبوه أوي.